Zanniat Auaw: Vol-2 Issue-3 Mar 2010

Zanniat Auaw

Vol-2 Issue-3

March 2010

Laai suahnia : 26 March 2010

Isiah 60:12 “Bawipa na per hiam lo miphun le ram te tu hnawmcanin um tuh ai, paai sek tuh ii.”

Kawlram ah Party te hming pe pan

22 Mar: Generation Students of the Union of Myanmar (GSUM) le the Union of Myanmar National Political Force (UMNPF) party te heh Kawlram 2010 kum Election ah zuam tum ve ai, 22 Mar 2010 nia ah Neypyidaw lam ah Rangoon khua in palai 1 veve feh ii.

UMNPF Chairman Aye Lwin in “kin ram ah hnufualhnak tam ngai um ai buaihnak te heh politic lam sawn in reltlang tuh heh i hmudaan ii” tiin rel ii.

National Unity Party te khai a rai hlan ah Naypyidaw ah amah te party thun tuh ii tiin rel ve ii. Democratic Party khai March 28 nia ah Naypyidaw ah palai hlat tum ti ii. Political party tam sawn khai Election hlan ni 60 dung ah Naypyidaw ah nemhngethnak bawn tum thuthang um ii.

April hla ah Kachin Party tel tuh

22 Mar: Kachin State Progressive Party (KSPP) khai April hla song ah Kawlram acozah ah register bawn tum hang ii. Party hotu 1 in Kawlram Takyan tiipuai hlan ah Naypyidaw ah party hmin ngan tuh ti ii.

Kachin Independence Organization (KIO) in KSPP heh 2009 kum March hla ah din sah ii. 2009 July hla fangin mipui in ling tuhin party dinthu phuang ii.

KSPP party heh Kachin state song tlawn sek ai khangsohnak lam buaipui tum thu au ii.

2010 kum Election ah Party te tel thil tuhin acozah ah April ni 15 hlan ah party te hming pe kul ii. Party register-hnak tuhin Ks. 300,000 (US $300) pe kuul ii.

Hacker te in Lailung Daap tete thu hmu

29 Nov 2009: Thuprukin Internet lutthiam te in scientists te te email hongsah ai, lailung heh saa tete i lo thu thuthup tam ngai hmusuak ti ii. Kin lailung heh saa aamaam bangin UN lam tianin aupui napui, thupruk neuin a dap tete thu mithiam te e-mail kuatdunhnak an linghnak thuthang um ii. Kum dang hnakin vur tam daan te, khuasik daan te heh lailung heh a dap lam sawn maw a saa lam sawn tihnak khuaruat pha um ngai ii.

2010 kum Election Daan phuang zo

9 Mar: March ni 9 nia ah 2010 kum Kawlram Election Daanpui phuang zo ii.

He daan song ah tunhlan ah acozah thawn buaihnak nai te Election ah tel thil tuh lo tihnak te tel ai, he daan hmangin NLD hotu Aung San Suukyi khai tel thil tuh lo ii.

He daan internet ai lang hiam te in a hnia ai website ah download thil ii.

http://www.networkmyanmar.org

Mon Party 2010 Election ah tel tuh

22 Mar: March ni 31 nia ah Mon party thar ding tuh thu thuthang um ii.

Mon party thar ah Advisory board member 5 um ai, committee member 15 um ii. Hetah teltu te khai Mon National Democratic Front (MNDF) ai te khai tel ai, Buddist puithiam te khai tel ii.

He party in 2010 Election ah tel tuh ii. NLD party khai Election ah tel tuh lo lekhaw he party lak ai hotu hrekkhat tu 2008 kum Kawlram acozah daan thar khiah lungkhim ve lo maanin tel tum lo thu khai thuthang um ii.

US in Burma Election Law lungkhim lo

22 Mar: Bangkok ai US Official palai in 2010 kum Burma Election Law heh thleng lo lekhaw Election felfai le dikcang tiin pom thil tuh lo ii tiin phuang ii.

George Kent, Thailand ai US Political Counsel in Chulalongkorn University ah he thu phuang ii. He US palai in tun ai Election heh ralkap acozah in amah te daihhnak te riltuhhnak i thu te, Election heh felfai i tuhin tun ai Politics maanin thawngto te suah tuhin phuang ve ii.

NLD in 29 Mar ah Election thula phuang tuh

22 Mar: 2010 kum Election ah Kawlram ai politica party ngaw ber le hmingthang ber National League for Democracy (NLD) tel tuh le tel tuh lo thu 29 March nia ah phuang tuh ii.

Arakan ah party thar ding tuh

24 Mar: Arakan state ah Union of Myanmar National Force Arakan State Party thar ding zo ii. He party in 2010 election ah tel tum thu phuang ii.

He party in township 14 ah mipui hoha pan zo ai, Sittwe ah party office dah tuh ai, Rangoon ah khai party office dah tuh ii.

1990 kum election fangin Arakan state ai constituency 26 ah Araken League for Democracy (ALD) in constituency 11 co ai, National League for Democracy (NLD) in 9 co le National Democratic Party for Human Rights (NDPHR) in 4 co awng ii. NUP party in 1 khai co lo awng ii.

Tun teng ah Arakan ah ralkap acozah in bawmhnak Union Solidarity and Development Association(USDA) khai roh ngaiin cangvai teng ii ai, Arakan mi i lo Rohingya te khai acozah daan in election ah tel tuhin tawlrel sahhnak te khai um teng ii.

Suu Kyi in Election ah NLD tel daih lo

23 Mar: National League for Democracy (NLD) hotu ber, kum rai ngai thawngtotu Aung San Suu in tun 2010 kum Burma Election ah a party tel tumhnak thula ah lungkhim lo thu a naperpui daan thiam Nyan Win in phuang ii. Inapui thurelcathnak ngaingai tu NLD party in relcathnak bangin i tuhin Suu Kyi in rel ii.

22 Mar (Monday) nia ah NLD thureltu ber Khin Maung Swe in Chairman Aung Shwe hnen ah NLD party ai Central Executive Committee thusuakhnak bangin party ai hoto te in Election ah tel tuh le tel tuh lo thula tu Aung San Suu Kyi le Aung Swe te hnenah aap thu rel ii.

Election Daan (Law) ah election ai tel tuh tu thawngto i tuh lo thu um ai, NLD heh Election ah tel lekhaw Aung San Suu Kyi heh NLD in suak ruaihnak ah cang tuh ii.

Zarh hmasa ah Aung Swe, kum 92 mi General Ne Win hnia ai Brigadier General per awng le party hotu hrekkhat te in 2010 Election ah NLD tel tuhin lungkhim ii. Cetih teng fangin party mi hrekkhat in NLD heh com tuh lawlaw daihtu te khai um ii. Election ah tel tuhin register bawn lekhaw party in Suu Kyi suak ruai kuul tuh hnakin ralkap acozah in bawnhnak ramdaanpui rem tuhin nor tuh daihtu te khai um ii.

Burma thula maanin UNSC ah buai

25 Mar: United Nations Security Council (UNSC) ai Veto nai te in Burma ram thula council ah phuang hnua fangin palai te lungkhim tlang lo hnak um ii.

Burma ram thula heh Vijay Nambiar, the chef-de-cabinet of UN Secretary-General Ban Ki-moon in rel hnua fangin meeting ah thu buai ii. Britian le China in Burma vum ai UNSC dinhmun lungkhim lo ai, palai dang te tu laivum pumpui ai ram election daan thawn tun ai Burma Election tu dikcang lo thu rel ii.

China in “ram pakhat ai acozah rildunhnak tu a ram acozah thu ii maanin upat kul ii” ti ii. Cen, “election khai he hnakin pha sawn in bawn thil tuhin UNSC in bawm kul ii” tiin rel ii.

Britian in China relhnak lungkhim lo ai, tunhlan pah in Burma vum ah UNSC in thurelcathnak tam ngai nai zo ai, felfai lo election maanin laivum ram te ca hnangamhnak lam ah laikul ii tiin rel ii. UNSC in pervo lang tuhin China relhnak heh dik ngai ii tiin rel ii. Cen Burma heh International Criminal Court (ICC) member i lo thu khai rel fawm ii.

Zanniat Fa te song ai Tinimhnak Lang hmasaber kin Pa Rev. Thang Tsin Thuanthu

Kin Pa Rev Thang Tsin thuanthu heh anupui nai tian suahzo ising le, tuntum ah Lungthlenghnak a ngah ai Pathian na a perhnak te hlirtlanghnak nai lehsal ngasing.

Pa Thang Tsin heh Saya Po Aye ai rualpui phaber ai a ruathnak maanin sunlam ah naupang te laai a cuuk hnua ah zanlam ah Pa Thang Tsin heh Pathian thu cuukin reel de ii. Pathian in misual te a iitdaan le nunaohnak kin ngah thilhnak tuh ca ai a tuarhnak thu te reel de ai, Pa Thang Tsin in a lingfiang ngah fangin Pathian sangtu mi ah cang ve hiam ai sangtu mite caa hnikhnaihhnak Tinimhnak khiah Lang ve tuhin lungkhim ihang. Cia vele Saya Po Aye khai aang ve ngai ai Halkha ai Siangbawi te laai kuat le Dr. A.E Carson, Dr. East le Karen Saya te pawl khiah Pa Thang Tsin tinimhnak pe tuhin Lumbang ah kawitlang ii. Cialai ah tinim tuh hmun tikhur um lai lo maanin Sangbawi te hlenghlan ah Saya Po Aye in Pa Thang Tsin heh amah tinim tuh hmun tikhur heh Singsih Cirh ah co ruai ai, Pa Thang Tsin khai thatho ngaiin lo co awng ii.

Siangbawi te Lumbang a hleng fangin khua song ah thuthanin tinim hiamtu le tinimhnak siik hiamtu um lekhaw tinim hmun ah kawi tuh vein sawm napui le aisu khai tinim hiam le siik hiam khai um lo ii. Ciatihbangin Halkha ai kawihnak Siangbawi Dr. A.E. Carson in 1906 kum Sept ni 5 nia ah Pa Thang Tsin heh tinim ai, Falam pengsong ai Tinimhnak Lang hmasabertu lo cang awng ii.

Pathian naper panhnak Pa Thang Tsin lungthlenghnak ngah ai, tinimhnak a lang hnua ah Lumbang khua le a hiang cingkim ai khua pawl ah thuthangpha reelin khualtlawng pan ihang. Pa Thang Tsin thuthangpha reelhnak maan Krihfa cang hmasaber pawl tu a nupui Nu Nu, Nai Men, a nau Ci Lian, Za Lian le Bualkhua ai Pa Cong Kham te pawl ii. 1907 kum Mar ni 31 nia, Halkha khua ai ding thar hnak Laitlang Baptist Association khawmpui hmasa ber ah a vum ai hming kin nganhnak le midang veksen mi 8 in tinimhnak lang ai, cia te pawl heh tinimhnak lang hmasa pawl ii. Ciami khawmpui ah sangtu mi veksen mi 18 khim ai, Thang Tsin, Pau Suan le Thuam Hang te pawl heh Pathian thuthangpha reel tuhin Saya ah lang ai Saya Thang Tsin tu saya Sia Khaw thawn Thlantlang ram ah Pathian thuthangpha reel tuhin pervo pehnak bangpahin thuthangpha reelin khualtlawng de ii.

Thuthangpha ca a tuarhnak, Pa Thang Tsin Lumbang khuasong ah Pathian Thuthangpha ca na a per pan fangin khuasong Upa te pawl in lo hua ve maanin thi tu seh ti ruathnak thawn Loram sem fangin Lumbang ramsong ai ramhuai ber hmun tihnak Singsih Cirh le Zaiti Cirh hmun heh Lo ah vai ruai ii. Cialai ai Upa te in “hemi ram na vai ai, na thi lo ilekhaw na thureelhnak khiah na sang tuh ii ing” ti'n zohsuamhnakin lo ti awng ii. Saya Thang Tsin khai “Pathian sang tuh ii ing” tihnak ponka a za fangin so ngai ai Ramhuai ber tihnak a lo ram te khiah Pathian hnen ah aaphnak nai hmasa ii. Sawngenhnak thawn lothawi pan ai a khuapui te hnakin hmain mai tai ai Halkha ai Siangbawi te pehnak Nimden ci pha khiah cing maanin ciami kum ah a khuapui te hnakin rongkhai tam ngai lo nai ii. Ciatihbang ai Ramhuai hmun vai ai thi tuh ai mite ruathnak Pa Thang Tsin heh a thi lo hlei ah rong tampui nai maanin a thureelhnak khai sangtu tam tete ii. Hlanlai ramhuai hmun ti ai a reel de hnak hmun heh tun tu Lumbang ramsong ai ti phaber hmun leh tunnia tian tihangdum pha ber hmun ah cang ii.

Vaikhat tu Saya Thang Tsin nau Pa Ci Lian Lo pil ca khuavang biahnak tuhin Lumbang khuasong Inn khi paisa 50 ten lo khawn ai Saya Thang Tsin tu “Pathian sang hnua ah he bang ai khuavang bia tuh hnak ca pekullo ii” ti'n lo pe hiam lo maanin khuasong Upa te thinraw ai “paisa a khawn hiam lo maanin na Pathian be pui Halkha, Tidim le kawl te um hmun ah tlan nakul tuh ii, kin khua ah um thil tuhlo ii si” ti'n lo ti ai Saya Thang Tsin khai tlan loin umhlen maanin a inn song ai a naihhnak thilri le rong te khiah lang sah ii. Ciafangin Saya Thang Tsin khai Falam Vuanthok zung ah feh ai “Pathian i sanghnak maanin khuasongin hnawn thilhnak le i thilri te i sutsahthilhnak daan um awm” ti'n zawt ai Vuanthok te in “ciabang daan um lo ii” ti'n a reel hlei ah khuasong Upa te khiah paisa 50 cawh betin Upa 2 khiah thawngto ai Halkha ah hla 6 um ruai bet ii.

Vaikhat ve leh tu Saya Thang Tsin khai a khualtlawn hmunin tlung fangin Lumbang ram ah sun zan zomin ruah lo cing le lamkhung hlun pha khai um loin min siau ii. Ciatihbang ai ruahcinghnak maanin laiminhnak te khiah a hmu fangin Noah san lai ai Tilik tlunghnak khiah a thinlung song ah hih ai, Lumbang khualu a hleng ve le “Lumbang te Pathian thu ning sang hiam lo maanin tilik tlung ngaikhaw ning thi tuh siau hang ii, ning hlawnthil naihnak hmuah siatsuah tuh siau i. Ning Sel, Vok le Ar te roin a sa ai tu siau ih, tilik tlung ngaikhaw lovangin ning sung tuh siau ii” ti'n au li ii. Khuasong Nupui hrekkhat thungai ah sang ai lauhnak maanin a kap te khai lo um ii. Ruah lekhaw hang nia nai lo cing lai betbo maanin mi hrekkhat in kin thi hlan ah ti'n Vok le Ar te rotu khai lo um ve ii. Ruahpui ahang lehsal fangin Saya Thang Tsin heh Upa te pawl in thudon reel ii si ti'n lo cawh awng ii.

Ordination ngahhnak Saya Thang Tsin heh kum 1907 panin thu cuuktu Saya perin thuthangpha reelin um ii. Laimi te lak ah Ordination pe tlak a um fangin Cuuktu Saya persa lak songin Saya Thuam Hang le Saya Vial Nang te heh kum 1925 ah Ordination pe hmasaber ai, avai 2hnak ah Kawl Bible Tlawng kai ai zirsuaktu Saya Sang Fen le Saya Van Lo te 2 heh kum 1926 November ni 7 nia ah Dr. J.H Cope le Dr C.U. Strait te in Ordination pe ii. Avai 3hnak ah Saya Thang Tsin heh kum 1928 March ni 25 nia ah Dr. J. H. Cope, Dr C.U Strait le Ordination ngah cia Saya te pawl in Ordination pe ii.

Akhual tlawn hmun ai Pathian Kutcak laarhnak Vaikhat tu Hmunli tlawn tuhin Run kaiso a kai laitengin hlivua sia rohngaiin zuang ai khuapui tlok tuh bangin khuate khai thim siau ai, a um fangin, Saya Thang Tsin khai com ai Pathian hnen ah a thinlung hmuahhmuah thawn sawngen ii. Asawngen ben veleh vankhai ciangsiau ai khuapui tlok tuhbang ai thimhnak te khai paai leh siau ii. Thuthangpha reel kong ai a thureel hnak laksong ah “tunhnua tu Lungto le Eek te khai mannai tuh ilai” ti'n lo reel de ai a reelhnak bangpahin tunlai ah Lungto te in mannai ai Eek te khai dawm ca mannai ngaiin zuar de ihang. Ciamaanin Hmunli te in “Saya Thang Tsin thureelhnak khim ihang” ti'n ti de ii. Ciatihbangin Laizo khua tlawn tuh ai a feh lai ah Laizo khualu a hleng fangin, Laizo Miuk le a khua Upa te Bawi caang tuh thawn tawkduun ai ciami te hnen ah Pathian thuthangpha reel ii. Laizo khua Upa te laksong ai mi pakhat in Lumbang Miuk Hlur Hmung phat lo hnak thu reel li le Saya Thang Tsin khai mah khua Miuk reelsiat li heh tuar ben loin thu eelduun ii. Athu eelduun lak ah Laizo khua pa in rinlopui in buanvut ii. Cia vele Saya Thang Tsin khai “Aw! I Pathian i bawm tu” ti'n pongsuakin buan ve ii. Ciatihbang ai a buanduun songin Saya Thang Tsin in velthum tian Laizo pa heh laipua ah hlimin neh ii. Cia fangin Laizo khua Upa te in “Sayapa na Pathian in na bawm ii. He pa heh kin khuasong ah mi cakber ii. Aisu in khai neh ben lo ii ing, ciamaanin hngal ngai ai puar khai puar ngai ii. Hetihbangin nang in na neh ben heh aangkul ngai ii” ti'n aan tlang ii. Saya Thang Tsin khai a zan fangin a buanhnak pa inn ah leeng le paisa fang 2 suumin phaniuin pon duun lehsal ii.

(April Zanniat Auaw ah peh leh tuh)

Mi te khuaruathnak ling thil tuh hang

11Mar: Tunhlan ah mi te khuaruathnak ling bentu heh dawithiam te bang leek in thil tuh vuah awng de ii.

University College London ai mithiam te in minung hluak in khuaruathnak te computer hmangin ling thil tuh thu tunnaai ah phuang ii. Professor Eleanor A. Maguire in mi 10 heh film dangdang siik ruai ai, siik ben fangin hluak siikhnak ceet song ah film siiktu te lu dah ruai ai, a khuaruathnak te computer hmang in siik saal ii. Computer ah a bangduun le bangduun lo hnak te fiang ngaiin in danglamhnak hmu ii.

Hetih bang imaanin tunhnua lam ah he hnakin pha sawn le ciang sawnin minung in khuaruathnak te heh computer hmangin siik thil leh tuh ii tiin mithiam te in rel ii.

Hlivua sia in US buai ruai

13 Mar: US ai ziat le sak lamin hlivua sia kawi ai, vanzuang te, tlangleng (Train) te le mipui milion hrek khiah Power Supply um lo maanin naper thil lo in buai ii.

Queensland Australian lam ah hlivua sia

14 Mar: Australia ram ai ziatlam an hlivua sia phun 5 lak ai tel hnak Hurricane pui Queensland ram lam seem tuhin kawi ii. Queensland ai Bureau of Meteorology mithiam te in hlivua heh nazi 1 ah 290km dungin kawi thu phuang ii. Whitsundays lam ah hlivua heh 15,000km dung haat ii.

US in Israel kham tuh

13 Mar: Jerusalem ai nisuakhnak lam ah Israel in innsa teng ai, US te lungkhim lo ai innsahnak pehzom lekhaw kham tuhin U.S. Middle East envoy George Mitchell in phuang ii. Israel in Jerusalem hlang lam ah umhmun inn te saa teng ii ai, he a bawmhnak te in US hmel hnawm ruai ngai ii tiin US lam in phuang ve ii.

Israel in he hmun ah Israel mi thar innsang 1600 umhmun bawn zo thu phuang zo ii.

Hetih bang ai Israel in Jerusalem hlang lam a nawt li hnak tu Solomon biakinn heh Muslim te kut ai lang leh tuhin zuamhnak ii. Israel te in Jerusalem biakinn lang thil lekhaw Jerusalem biakinn thar innsahnak tuh thilri te ralring sek zo ai, a song ai dah tuhhnak thilri te tianin ralring cia zo ii.

UK in Green Fuel hlawntling lo

2 Mar: UK in Fossil Fuel (Diesiel, Petrol, etc) te hmang tuh lo ai thing le hampa lam hmang tuhin tamtahhnak nai ii. He hrangah $4.5 billion kum 1 ca hmang ii.

He tumtahhnak bang in ram kau ngaingai ai thingkung te vawng sek ai, thil ciinghnak ah hmang ii. Mithiam te in hetih bang ai thingkung tam ngai hnawmruai heh Fossil Fuel hmang hnak in lailung hnawmruai sawn ii ti ii.

Tun kum song ah UK in Fuel veksen ai 3.2 heh thing le hampa lam in bawnhna i tuh in tumtahhnak nai ai, 2020 kum ah thing le hnampa lam in bawnhnak Fuel heh 100 ah 13 i tuh in tumtahhnak nai ii.

Fossil Fuel aiawh ai ciinghnak te heh thingkung ngaw puipui tluk in hlivua le nunghing te khausadaan khai kilkhawl ben lo thu mithiam te in rel ii.

Naupang Vaibur le So-ur

-Ram Lian Mawi/Aizawl

Hemi kin thupui thawn pehpar in al ingsakhai tampui umtuh napui ai Mi pahnih khat tal in phahnemhnak naipang selai ti ai ruathnak thawn nganhnak ii.

Naupang Vaibur le So-ur thawn pehpar in khuhkhuh khawsik ruangsa le thoben lo tian ihhmun ai kual kuul te khai huap thil tuh ii. Naupang te in urhnak dotu/ khamtu tuh in cakhnak nai tam lo ai thazaang nai tlawm deuh lai maan in urhnak ngahbaai in kai bai cangce ii. Upa te in za inam lo ai kin tuarbenhnak te heh naupang te ca tu tuarharngai ai, sizung lam ai kilkhawlkuul d inhmun tian hleng thai ii. Vaibur le So-ur heh naupang te urhnak laar le tlanglawn phunkhat ii. Hebang urhnak heh tlangrai bang in camcu nai lo ai a fur a khal ai urthai le fuhduun thai urhnak ii. Naupang lai ai vaibur so-ur awng lo tu um natu hlah s ing. Ciamaan in he urhnak heh So ur - Pneumonia le So-ur- Pneumonia lo ti'n phun hnih ah khan selai!

Vaibur: Khawsik serso, khuh kherhkho, Hnaphnar phuh le hnarpit, Dangthip, Lu ritbur ai om nuam lo heh Vaibur kin tihnak ii le tiksa ruangpum rawlin urthai ii. He Vaibur urhnak heh urhnak hik Virus/Allergy maan ai urhnak ii le kaai duun fuh duun baai urhnak i maanin tlangrai bangin innkua ai urkhai bai niu ii. Kin tiksa kin cak ai urhnak dang nai lo te ca tu si ai loin khai amah thu niuin lawm thai leh ii. Vaibur heh Si ai te in zarhkhat songin cakhnak ngah lehsal ai, Si ai lo te in ni sarih song tuar de ii ti'n mithiam te in reel de ii. Vaibur ai kin ur fangin cakhnak kin ngah lehsal tuh hnak ca kin taksa kin cak tuhhnakin rawngaih pha le ti cianghlim dingtam ai Antibipotics (Lu-ur-lawm-si) Paracetamol aiin cakhnak ngah lehsal thil ai Sidang ai kuul lo ii.

So-ur (Pneumonia): Pneumonia heh urhnak laar Daplut kin tihnak phunkhat ii. Upa micak te ca tu he urhnak heh laupha umhang lo napui le Naupang te ca laukuul ngai ii. He urhnak heh mi khrekkhat in tu naupang rektu ii ti'n reel de ii. Pneumonia urhnak heh caan saupui urthai urhnak i lo ai vaikhat urhnua urthai lek lo urhnak khai i lo ii. Ikhalselai a urte heh haihawh harsain haihawh pin loin umthai maanin naupang te ca tu laukuul ngai pan ii. Hemi Pneumonia ur kin lingthilhnak tuhin mi ur haihawh daan heh siik kin kuul ai miur haihawh rang (Fast Breathing ) lekhaw Pneumonia urhnak tuar i thai ii. Naupang um menma laiin minute khat song ai a haihawh daan heh a hnia ai bangin siar thil tuh ai ling thil tuh ii.

Nausen kumzah Minute 1 song haihawhzah

Hla 2 tan hnia Vai 60 hnakin tam lekhaw haihawh rang ii

Hla 2 - kum 1 karlak Vai 50 hnakin tam lekhaw haihawh rang ii

Hla 12 in kum 5 karlak Vai 40 hnakin rang lekhaw haihawh rang ii

Naupang haihawh rang i lekhaw Pneumonia in ur ii, haihawh rang hlah lekhaw Vaibur So-ur menma ii.

Nau haihawh fangin a so hlin dupdo (Chest indrawing) khuar dupdo ilekhaw nau heh ur roh ngai ii. Pneumonia ur ling thil tuhhnak ca ai X-ray heh thil kuullo ii. Naupang Pneumonia in ur lekhaw a rang lamin Sizung ah fehpui heh a phaber ii. Doctor um lo ilekhaw Amoxycillin maw Cotrimoxa-zole maw pekuul ii. So-ur Pneumonia i lo heh Vaibur Dangthip ii le Allergy maan ai urhnak Reactive Airway Disease ii. Tikcucaan thleng (Weather Change ) maan le hlivua sia le thil khu te maanin naupang te in tuar ben lo ai urhnak ii, urthai leklo napui ai Pneumonia bang in laukuul lo ii. Suun lam tah hnakin zanlam ah naupang te heh khuhkhuh roh thai ii. Naupang lai ai Vaibur le So-ur nai te heh uham fangin lawm thei leh ii. Naupang tamber tu kum 5 dung ah So-ur lawm pan ai naupang khang thil lo tian ai So-ur ilekhaw Sizung lamah fehpui heh a pha ber ii. Sizung feh harsa hmun ai um te ca ah khuhkhuh lawm si Winrex le Corex DX tibang si sang deuh le Wymox a kopin pe khai sual hang lo ii.

Vaibur le So-ur heh camcu nai lo ai ur thai ii le, naupang urfangin mangrau le thinlau lo niuin a urdaan heh pha niuin siik hmasa tuh ai, a urhnak heh lingciang hmasa kin kuul ii. Vaibur urhnak heh camcu nai lo ai ur thai inapui ai, si ai loin khai kin cak leh caan tam ngai ii. Pneumonia urhnak heh tam lo napui ai a rang ai ling kin kuul ai, si thawn kilkhawl heh thupui ngai ii. Vaikhat ur hnua ur leklo thai tu i lo ii. Pneumonia i lo Vaibur So-ur heh ur leklo thai napui ai, Si (Medicine) tam ze hmang kuul lo ii. Si heh kin cak tuhhnak ca a pha bang pahin urhnak khai kin pe thai ti heh ling kin kuul ii. Ciamaanin naupang ca si heh a thiam te rawn hmasa ai a kuulhnak leek ah hmangthiam kin kuul ii.

Cyber Dodunhnak lam mak tete

8 Mar: Tun kin san ah internet lam thiamhnak saang aamaam ai, internet songin computer lam hnawmruai dunhnak le dodunhnak khai mak tete ii.

Mithiam te tam tete ai midang te computer hnawmruai tuhin internet hmangin dodunhnak khai khangso aamaam ii.

America ram ai FBI rori in khai misual te in internet hmangin FBI thuthup te siik thil leek i lo ai, computer song ai thula poimawh te tian danglam ruai ben ii tiin a aicaan thu phuang ii.

Hetih bang ai Cyber lam hmangin computer lam hnawmruaihnak maanin kum siar $226 billion dung sumpai bo thu khai mithiam te in rel ii.

Company hrekkhat te ai computer song ai thil poimawh dahhnak te khai paai sek ai, sumpai lam tianinternet hmangin ru sah ben ai, naperhnak lam thil poimawh tam ngai paai tiato de maanin company tam ngai buai ngai ii.

Virus le Worms te khai ni 1 hnua ni 1 danglam tete ai, a khamhnak Software te khai pha aamaamin bawn maanin Virus le Worms te khai computer khamhnak Antivirus te in kham ben lo tianin mithiam hrekkhat te in internet lam lo buai ve ii.

Indonesia ah hlinhlin

14 Mar: 6.4 magnitude haathnak hlinhlin heh Indonesia ram ah hlin dek ii. Moluccas, /Spice Islands hmun ah zing lam 9:57am ah hlin ii. Tsunami khai tlawm neu cang napui, thi le thilri hnawm roh ze ruai lo ii.

Chelsea Football Club ah...

Chelsea Football Club naitupa Rusia millionair Roman Abramovich in tunai a club manager Ancelotti daih daan bangin player thar leihnak tuh sumpai pe tuh ii ti’n thu thang ii.

UEFA Champions League round of 16 2nd leg ah Chelsea team manager hlun Joes Morinho kilkhawlhnak Italy football team Intermilan thawn Dt 17/3/2010 zanlai nazi 1:15 Ist ah Stamford Bridge Chelsea bualrawn ah sirh le Intermilan in 1:0 in neh maanin Intermilan heh 2:0 Agreegate in cak ai, UEFA Champions League Quarter Final lut ii.

Chelsea Football Club ai players a tam sawn heh Laivum ai hmingthang Star Player lolek inapui le kum lam ah 30 vum kai tam sawn ai hemi te pawl khawmtu khai tun ai a neh lo hnak Intermilan Club Manager napertu Joes Morinho ii.

Chelsea team ah luttuh ai a daihhnak le Lei a tumhnak tepawl song ai milaar deuh te pawl tu Liverpool striker Fernando Torres ii le pound 50 million lai khai aman ca pengam ii ti’n thuthang le Torres heh Liverpool dinhmun phahlah lekhaw club dang ai thawn tuhin khuaruathnak a nai thu le England ah thotho um a hiamhnak thu te loreel maanin Chelsea thawn pehzom tuh ai umsinhnak um ii. Ciahlei ah Bayen Munich midfielder Bastian Schwein Streiger khai a lei tumhnak ah tel ii, He pa heh thahat ngai le a misaldaan ah English style ii, Ball Cross thiam ngai le dawp cak ngai imaanin English Football saldaan thawn remcang tuh ai ruathnak um maanin Chelsea FC te in a daihhnak ii. Chelsea FC te in kum hmasa lam pah ai leitum ai a zawthnak de Atletico Madrid forward Sergio Aguero khai pon tuhsal ai Chelsea FC in a buaihnak ber right back ai a hmang tuhhnak ca Intermilan right back Maicon khai a daihthu reel ii.

Hetihbang ai football player thar leituh fangin Club caai phahnemhnak nainawnlo tepawl heh suakruai kuul tuh maanin team rezap ai adah hnak te song an Joe Cole heh rezap tohkham ai to menma tahhnakin tu first 11 ai asirh ngah thil tuhhmun ai thawn heh daihsawn tuh ai umhnak ummaanin suktuhin umhnak um ii.Cialo ah Nicolas Anelka heh kumkhat dung contract-in hiamhlah lekhaw suakthei tuh ai, Deco khai ahlawh sanglawn ai daihbangin hmangthil loilo ii le suak selai phasawn tuh ai umhnak um ii, Cialo ah Paulo Ferreira, Juliano Belletti le Hilario te pawl khai Stamford Bridge ah ripui umtuhin umsin hnak umlo ii.

Chelsea FC in football players te leek iloin Coaching Staff te khai tu nai Manager Ancelotti in a daihdaan bang ai thleng tuhin thunaihnak sang ngai pe tuh ii ti’n thu thang ii.

UEFA Champions League Quarter Final List

Arsenal in UEFA Champions League ah kum 2006 ah Barcelona thawn Final vaikhat thiah lo sirh awng ai, Barcelona neh loin pahnihhnak ah um ii. Tun kum Quarter Final ah kum 1999 ai Manchester United in final ai a lo neh awng hnak Bayen Munich thawn sirh tuh ai, Arsenal khai kum 2006 ai a neh lo hnak Barcelona thawn sirh tuh ii.

Arsenal le Barcelona te sirh tuhhnak ah Thierry Henry heh a Club hlun Arsenal caai Goal tam ber thuntu inapui tuntum ah a Club hlun lam ah Goal thun teek ai, sirh kuul tuh ai, Arsenal Captain Cesc Fabregas khai a Club hlun le Football a zir hmasa hmun Barcelona lam ah Goal thun teekin sirh tuh ve ii.

France team pahnih Lyon le Bordeaux te in Quarter Final sirh tuh ve maanin France Team pakhat in Semi Final lut tuh tu fiangsa ii. Intermilan in Rusia Club CSKA Moscow te sirh tuh ii. Arsenal le Barcelona team hnih ai cak sawn le CSKA Moscow le Intermilan team hnih ai cak sawn veve te Semi Final ah tawk duun tuh ai, Manchester United le Bayen Munich team pahnih ai caksawn le France team pahnih ai caksawn te Semi Final ah tawkduun tuh ii.

March ni 30 le ni 31 ah Quarter Final First Leg sirh tuh ai, April ni 6 le ni 7 ah 2nd Leg sirh tuh ii. April ni 20 le ni 21 ah Semi Final First Leg sirh tuh ai April ni 27 le ni 28 ah 2nd Leg sirhsal tuh ii.

English Premier League ah

Manchester United Champion tuhhnak lamkhung ai kham thaitu Liverpool heh vaithum a zawn ai Champion hnua ah avai 4hnak tuh Champion leh tumin Manchester United in thapui suahin 21 Mar 2010 nia zan 7:00pm India Standard Time ah Liverpool FC thawn Manchester United bualrawn ah sirh le 2:1 in cak ii. Hemi zan ai a cak tuhhnak Goal heh Korea International Park Ji Sung in minute 60 hnak ah mawi ngaiin a lu hmangin tohlut hnak ii. Liverpool FC heh English Premier League ah 6hnak dinhmunin kai ben lo maanin UEFA Champions League sirhngah tuh dinhmun ah ding ben lo ii.

Bawhlung a sirh panin minute panga hnak ah United lamin Passing pe duunhnak Liverpool Captain Steven Gerrard in dawng le Dirk Kuyt hnen ah pesalin Dirk Kuyt in United Full Back te karlak ai lo caangtu Torres hnen ah pesal le Torres in a lu hmangin United goal ah tohlut ii.

Season hmasa ah Liverpool in United heh 4:1 laiin lo nehzo maanin tuntum ah khai ciabang heh hleng lehsal ngaikhaw ti'n ruathnak kin nairuai man ii. Ikhalselai tun kum tu United lam heh ralring ve ngai maanin a si phurhnak sutsaal tuhin nawrsaal le United Right Winger Atonio Valencia in bawhlung a khorlaai tak Liverpool Full Back Javier Mascherano in lo duuk maanin Refree pa in Penalty cawh le United Forward Wayne Rooney in sirh le Liverpool Goal-Keeper Pepe Reina in kham ngah napui bawhlung lelsaalhnak heh Rooney in Goal song ah thun maanin 1:1 in First Half tawp tian Goal dang lut lo ii.

Hemite teamhnih sirh heh bawhlung sirh hmuhnuam ngaingawn ilo ii, zaimaan tifangin khatlam le khatlam heh goal thunteek ai nawrduun um loin amah te lam veve goal lut tuh loin kham teek sawn maan ii. Hemi zan ai laukuulber tu United winger Antonio Valencia ii, zaimaan tifang in Liverpool left side back ai Emiliano Insua in neh ngaal lo maan ii. Valencia in han lam sir an Goal hmai ai bawhlung sirhphai hnak vaihnih lai pha ngai napui ai, Park Ji Sung in tohlut lo maanin pamhaih kuul ngai ii.

Minute 60 hnak ah United Midfielder Darren Fletcher in Liverpool Goal hmai ah bawhlung ron sirhphai le Korea International Park Ji Sung in a lu hmangin Liverpool Goal song ah tohlut maanin Manchester United in 2:1 in nehhnak ngah ii.

English Premier League Top 5 Points Table

1. Manchester United 31 Play 22 Win 3 Draw 6 Lost 69 Points

2. Arsenal 31 Play 21 Win 4 Draw 6 Lost 67 Points

3. Chelsea 30 Play 20 Win 5 Draw 5 Lost 65 Points

4. Tottenham 30 Play 16 Win 7 Draw 7 Lost 55 Points

5. Manchester City 29 Play 14 Win 11 Draw 4 Lost 53 Points

ZCF (Aizawl) ah Crusade

Aizawl, Mizoram ai Zanniat Christian Fellowship ah Crusade um tuh ii. 5-11 April 2010 song i tuh ai, thuthangpha reltu tuh tu Pastor Rev. Dr. Biak Chhawna i tuh ii.

Zanniat te kin pe tete ii

Ramsong ai um Zanniat te khai Zanniat mi veksen huapin khuaruathnak nai ben lo hang ii. Rampua ai hleng Zanniat te khai miphun dang te lak ah tlangleng maanin kin hming le kin fa te tianin Miphundang ah cang sek hang ii. India lam hleng Zanniat mi veksen dawn heh Mizo ah cang sek ai, Malaysia lam hleng Zanniat te khai Kawlpon le Falam pon leek uartu ah cang sek ii.

Miphundang te amah te lala kilkawl daan te, khangso daan te ot ve napui Zanniat mi lala sawmdun tuh le kilkhawl dun tuhin zei nam lo kin tam ze ii. Hetih fang tu nung kongin miphun paai i hang ii sing. -Salai TT

Laitlang ai khua 1 maikang sek

18 Mar: March ni 18 nia ah Laitlang ai Lungkhin khua, Hakha ram ai um heh maikaang ai a khua veksen kaang sek ii. Rampalak mai in hetin khua tian kaang sek ai, inn veksen le rong ai tuh khawl cia hnak te tianin a veksen kaang sek ii. Mi 1000 inn le ai tuh nai loin um ii.

2010 Election ah tel tuh te party hrekkhat

14 Mar: Kawlram acozah in 2010 election ai tel tuh party tu May ni 7 nia tian Register bawn thil tiin thu suah zo ii.

Ahnia ai te heh election ai tel tuh le tel tum party te ii:

1. Union of Myanmar Federation of National Politics (register zo)

2. 88 Generation Student Youths (Union of Myanmar) (register zo)

3. National Unity Party

4. National Political Alliance

5. Union Democratic Alliance

6. Democratic Party

7. Union Solidarity and Development Association (party 1 hnakin tam din thai)

8. United Democratic Party

9. Peace and Diversity Party

10. Phyo Min Thein ai hohahnak party

(Party hming phuang rih lo ii)

11. Kawlram ai um Bengalis miphun te party (Party hming phuang rih lo)

TATA in Burma ah motor bawn tuh

23 Mar: India ram ai motor company ngaw ber le hmingthang ber TATA in Kawlram thawn remrelhnak bawn zo ai, Kawlram ah motor company din tuh ii.

He naper tuhhnak heh US$20 million maan i tuh ai, ton 20-30 rithnak motor te TATA company in Kawlram ah bawn tuh ii. Motor bawnhnak heh Magwe ah din tuh ai, Rangoon in 480km hla ii. He tumtahhnak heh 2011 ah nung tuh ii.

Myanmar Embassy ah autu te pom tuar

19 Mar: March ni 19 nia ah Delhi ai um Kawlram mi hrekkhat in Myanmar Embassy hmai ah 2010 Election thula ah aanglohnak daakruaihnak bawn tlang ii. Embassy hmai ai thilri veksen hnawm ruai sek ai, Embassy gate khai hong thil tuh loin thiiri thawn kalh ii.

Heta mi 69 tel ai, nu 1 in nau cawi kongin tel ve ii. Police te in veksen Police Station ah ah lur ruai sek ai, mi 26 (nupang 5 le pasal 11) te tu thawngto tuhin pom ii. Mi 43 tu zan ah suak ruai saal ii. Mi 26 te tu March 20 nia ah suak ruai ai, amah te thula heh March 23 nia ah relcat ii.

Embassy hmai ai tel te lak ah Zanniat mi 9 tel ai, nau cawi kul 1 tel ii. Mi 26 pomhnak lak ah Zanniat mi pasal 2 tel ii.

Zanniat Auaw Editorial Board

Chief Editor:

Salai Tluang Kip Thang, New Delhi

Ph: +919910961894

Joint Editor:

Pa Ram Lian Mawi, Aizawl

Ph: +919615334138

Local News:

Salai Zam Luai Thang, Aizawl

Ph: +919436788991

Health Issue writer:

Mai Khim Hlen, Aizawl

Ph: + 919862808747 Aizawl

Political News:

Salai Ngin Za Pum, New Delhi

Ph: +91987114346

International News:

Salai Thian Ro Uk, Malaysia

Ph: +60-162053718

Published by:

Zanniat Youth Organization-Zanniat Mino Pawlkom (ZYO-ZMP)

Zanniat Auaw: Vol-2 Issue-2 Feb 2010

Zanniat Auaw
Vol-2 Issue-2
Febuary 2010
Laaisuahnia : 1 March 2010

Isiah 60:12 “Bawipa na per hiam lo miphun le ram te tu hnawmcan in um tuh ai, paai sek tuh ii.”

Editorial
Zanniat Laai le Pon
-Ram Lian Mawi, Aizawl

Zanniat Auaw in kumkhat hmel kinhmu hnua ah, famkhimlo hnak tampui laksong in kinpon le kin laai khangso tuhhnak ca ai daihsahhnak thawn kin forh kin so tute leh a siartu mipui veksen hnen ah aanghnak thu ningreel ing. Cia laksong in tun kumthar ai kin tawkhnak thu pakhat ah cen, “Zanniat Auaw heh Zanniat Pon hnawmruaitu” ti'n mawhhlukhnak khai tawk leh sal ai kei ngawn mawh kinhluk ii ti'n hmulo ing. He kin Thuthang Laai kin naihsun heh tun tah ai pha le khangso kin daihsah hnak maan ai, zuam sinsin tuh ai kin forhhnak ah ruat ing.
Ahmasa in asuakzo hnak kin thuthang ah Zanniat Pon kin hmangkhelh hnak le kin ngan sual hnak te kin lingthiam sah tuh in ninghio ning ngen kong in asiar tu te in khai kin khelhhnak te kin remsah tuh in ning sawm ing.

Kin Zanniat Pon in Magazine le laaibu tlawmniu kin naihnak song in Zanniat Auaw heh Thuthang Laai kin naihnak sun ii. Cen, hemi thuthang laai heh kin thiamlo niu kong in kin Ram le kin miphun in Laivum thuthang niuniu le Ramsong le Rampua ai Zanniat Fate thu le laa ai kin pehzawmduun thilhnak tuh ai bawnhnak a ii bangpah in Ramsong le Rampua ai laaingan thei te hnen ah khai Article, Thuthang le Thuanthu te khai Zanniat Auaw ah kuattuh in sawmhnak te khai vai tampui suahde napui ai, tunnia tian kinkuattu pahnih thum hlei um lailo ii.
Zaikhai itu selai Zanniat te lak ah khai kin pon heh khuakhat le khuakhat khai kin bangdunlo hmun tampui um ve maanin kinmah khua pon lo deuh te khai hmanghnak caan tampui umtuh maanin siardaan thiamtlang ngasing khaw, Zanniat Pon ai kin nailohnak te khai miphundang pon kin hmanghnak caan tampui um tuh ii. Ciabang te heh kin Zanniat Pon hnawm ruaitu ah ruatlo in kin khangso tuhhnak ca kinmah pon ah hmang tek sawn ngasing. He Zanniat Auaw hmang in kin Pon kin Laai khangsohnak tuh in zuamtlang nga sing. Kin pon khangso ai famkhim tuh hnak in kin veksen in pervo nai ii sing.

Zanniat Auaw Editorial Board

Chief Editor:
Salai Tluang Kip Thang, New Delhi
Ph: +919910961894

Joint Editor:
Pa Ram Lian Mawi, Aizawl
Ph: +919615334138

Local News:
Salai Zam Luai Thang, Aizawl
Ph: +919436788991

Health Issue writer:
Mai Khim Hlen, Aizawl
Ph: + 919862808747 Aizawl

Political News:
Salai Ngin Za Pum, New Delhi
Ph: +91987114346

International News:
Salai Thian Ro Uk Lian, Malaysia
Ph: +60-162053718


Than Swe: 2010 Election heh dikcang tuh

12 Feb: Burma Union Day (Pyi Thaung Suh Nayh) nia ai mipui hmai ah thurelhnak ah Gen Than Swe in tun kum 2010 ai rampum ah acozah thar ril tuhhnak heh dikcang ngaiin bawm tuh thu phuang ii.

He thula heh Burma ram ai thuthang laai The New Light of Myanmar ah Burma Union Day thucah ah Than Swe in telh ii. He thuthang ah ram ai Roadmap lamkhung bangin Election heh dikcang ngaiin um tuh ii tiin Than Swe in ngan ii. Cia leek i lo ai mipui te heh Election ah tel thil tuh ai, vote khai pe thil tuh ii tiin ngan ii. Mipui te in ramdaan thar heh lungkhim ngai ai, ram thar din tuhin tha so tlang ngai ii tiin ngan fawm ii.

Inapui Than Swe in zaikom ah Election nai tuh tihnak thula thanhnak nai lo ii.

Kawlram ai Political Party hmingthang ber NLD khai Election ah tel tuh maw tel tuhlo khai tunnia tian thusuah um lailo ii. NLD te in Election bawn tuh daan te le Election nai tuh nia te tunnia tian thusuah umlo maanin Election ah tel tuh maw tihnak rel thillo ti ii.1947 ai Panglong Agreement ah Gen Aung San le Chin, Kachin le Shan miphun ai upa te in kawlram heh Union of Burma tiin ding tuhin hming nganhnak nai awng ai, cetin Burma ram heh lo ding ii. Inapui Gen Aung San thi hnua fangin Panglong Agreement ai bangin kawlram heh i lehlo ai tunnia tian ramsong miphun te le Kawl te karlak ah hmudun thiamlohnak tam ngai um ii.

2010 kum Feb 14 nia heh tumce ngai
Febuary ni 14 nia ah Western ram pawl tu Valentines Day ii, iithnak lam le daihdunhnak lam in hiamngai ai hmang tlang hnaknai ii.
Western ram ah Valentines Day inapui Eastern ram ah China miphun te ai Kumthar (Chinese New Year) i ve ii. 2010 kum heh Chinese te ai Ni Kum (Lunar Year) ii.

Ciamaanin Asia ram ah Valentine’s Day khai i fawm ai Chinese New Year khai i fawm thawn iithnak lam, daihdunhnak lam thawn kumthar puai thawn tumce ngaiin hmang tlang ii.
Asia ram ah Feb 14 nia ber heh ni San (Red) ii. Ciamaanin thilri le mawihnak lam khai a san lam lo leek hmang ii. Hnikpon khai a san lam lo leek sil tlang ai, lehsawng te thawn paar mawihnak phuncang thawn a hiam thai ber le mawi thai berin Feb 14 nia heh hmang tlang ii.

UN Special Repporteur in Suu Kyi tawk tum

12 Feb: Tomas Ojea Quintana (kawl ram ca UN Special Repporteur) in Ralkap Acozah hnenah Suu Kyi tawk thil tuhin ngen ii. He thula heh Geneva ai UN Human Rights group te thuthanglaai ah suah ii.

Tomas Ojea Quintana in tun tum tu Ralkap Acozah in siang tuh ii tiin rel ve ii. 2010 Election hlan ah kawlram ah lut tum ai, kawl ram in politics maanin thawngto te suah ruai tuh, ramdaan bawnhnak rem saal tuh, laivum pumpui ai hmanghnak daan te hlun tuh, hlaihdanhak umlo in Election nai tuh hnak thula te le dikcang ngaiin rildunhnak um thil tuh hnak tuhla te heh Tomas Ojea Quintana in kawlram thula ah phuang awng zo ii.



Olympic Games Canada ram ah

12 Feb: Canada ram ai Vancouver ah Winter Olympic 2010 hmang tlang hang ii. Ram 80 ai palai te he Olympic Games ah zuamdun tuh ii.
Olympic Games honghnak caan ah Canada ai miphun hmasa (Aboriginals) 4 te in amah te pon in Olympic caanghnak thu rel hmasa ai, cia hnua ah honghnak puai in pehzom ii. Aboriginal miphun te laam thawn puai hampan lamah mipui caanghnak nai hnua ah La sathiam, Nelly Furtado, Bryan Adams, le Sarah Mclaughlin te in la mawi sa ai, Olympic maifar khai NBA ai star Steve Nash in keng ii.

Film in Holy Bible dikhnak phuang tuh

11 Feb: The Exodus Conspiracy tihnak Film thar heh Bible lam mithiam te in tawlrel teng ii. He Film heh 2007 ah suah tuhin tumtahhnak inapui Bible dikdaan telh pha tam ze maanin tunnia tian suah thil lailo ii. He film heh Film menma ilo ai, Bible ai thula te a tak ngaingai hmu pha umdaan te zingzoihnak pawl dahkhawmhnak Documentation Film ii.
Aham pan fangin Bible ai Exodus thula dikdaan te Film in bawn tumhnak inapui Bible thula dikdaan telh bet pha tam ze maanin hetin Film suah vual thillohnak ii.
He film ah Abraham thuanthu in tun dinhmun ai Israel te dinhmun thawn, tun ai Israeli President Shimon Peres le Prime Minister Benjamin Netanyahu thula lam te tian in tel sek tuh ii. Thil poimawh ngaingai tel tuh ai, Arab ram te, a hlaice in Egypt le Saudi Arabia ram te in Bible dikhnak lailung hnia ai tawkhnak thilri thula thupdaan te, Middle East ram thudik heh laivum in ling tuhlo in Arab te in a bawnhnak te, tunhlan kum 3500 dung ai thuanthu dik te heh mi in ling tuh loin le Bible dikhnak minung te in ling tuh loin tawlrelhnak te le bawnhnak te tian in tel sek tuh ii.

Cia leek i lo ai, Jews miphun te heh Israel ram naitu ngaingai idaan te, Palestine tihnak heh Romans, British le tun ai Arab te in hming bawncop daan te tian in tel tuh ai, Israel ram thula tian fiangruaihnak i tuh fawm ii. Kum 88 song Arab te in Israel ram ding tuh loin a dodaan te Arab te sawn heh ram dintu i tuhin thu bawndaan te tian in tel tuh ii.
Cen, Sinai Tlang (Mount Sinai) tihnak heh tunhlan ah hmun 13 ah sii awng ai a umhmun ngaigai tu Saudi Arabia ram songah um thu te, mithiam hrekkhat in Israel te in Reed Sea sawn tan ti hnak heh Red Sea ihnak thu te tian, Arab mite in Bible ai Israel miuk hmingthang Joseph hlan siatsuah hnak video te tian in tel sek tuh ii. Bible thula dikdaan phuanghnak i maanin Film hming khai hnawta ah hming dang ah thleng saal khai i thai ai, zeikom fangin mipui siik thil tuhin suah thiltuh tihnak tu tawlreltute in phuang lailo ii.

Zaikom ah Minung in Microbes neh tuh?

12 Feb: Tunhlan kum zaimaw zah dungah minung ur ruaitu pangang pawl heh sii hmangin neh thil ii tiin au awng de ii. Inapui tun kin sah ah tunhlan ai sii te heh na per lo hang ii. Ciamaanin zaikom ah minung in mit thawn hmu thillohnak nunghing te heh neh caan um ni tihnak heh mithiam te khuaruah hnak tam ruaitu ngai ii.

UK ram ai Health Protection Agency in khai tun hlan kum 20 ah sii thawn neh awnghnak minung urruaitu nunghing ciik (Microbes)te heh tuntu neh thillo hang ii ti ai Microbes te nehhnak tuh sii thar bawn kul tio ai, harsa ngai ii tiin phuang ii.

Tunlai urhnak Swine Flu (H1N1) heh neh thil hang ti’n reel napui, araihlan ah nehthil nawn lo ii ti’n thuthang lehsal ii. UK ah H1N1 heh neh lo tete ai he microbe te in sii heh neh tete sawn hang ii.

Bird Flu (H5N1) khai tun tian neh thil lo ai, tun hlan ai neh awnghnak Microbe te khai um lehsal pan lala ii. Tunhlan Europe ram hmun 3 then ai hmun 1 mi thi ruaitu bacteria khai tun China ram ah um saal ii.

Minung mit in hmu thillohnak nunghing te heh zeikom ah neh ben tuh tihnak in mithiam te khuaruat buai ruai ngai ii.

High Court in Suu Kyi ngenhnak pomlo

26 Feb: kawlram High Court in Aung San Suu Kyi ngenhnak Laai pomsahlo thu phuang ii.
May 2009 ai American pa in Suu Kyi inn ah daan loin luthnak thula maanin kum 3 song thawng to ruai tuh ai, naper harsa khai per ruai tuhin acozah in relcat napui Snr-Gen Than Swe in hla18inn song ah thawngto tuhin phuang saal maanin thawng in suak thillo in um hnak ii. Tunah Suu Kyi heh a kum 64 khim zo ii.

Kawlram in Lawng comhmun te Private ah

26 Feb: Myanmar Port Authority (MPA) in Rangoon ai lawngcomhmun te khiah mipui te kut ah aap tuh ii ti’n thuthang um ii.

Tun dinhmun ah acozah in lawngcomhmun 2 nai ii; Rangoon ai Sule le Bo Aung Kyaw. Myanmar International Terminal Thilawa (MITT) tihnak heh Rangoon in 25 km ziatlam ah um ai Hong Kong ai Hutchinson Port Holdings in kilkhawl ii. MITT and Asia World Co, Ltd., te in lawngcomhmun a thar 1 bawn tuh in tumtah hnak nai ii.

kawlram acozah in a kilkhawlhnak Myanmar Five Star lawngcomhmun khai Myanmar Economic Holdings company hnenah zuar tum hang ii. Tunkum songah acozah in gas thanhmun 246 le ceetzung 110 heh mipui hnenah aap zo ii.

Hyundai company in kawlram Gas ngah

13 Feb: South Korea ai Daewoo International Corp in US $1.4 billion man Hyundai company hnen ah kawlram ai gas lang tuhin lungkhim zo ii. Hetin Hyundai in 2013 kum panin kawlram ai gas lang tuh ii.

Hyundai in 40,000 ton rithnak gas cohnak khai din tuh ii.

China in khai Burma ram ai gas co ai, Arakan in China ram tian pipe thawn pehzom tuhin tawlrel teng ii.







UN in ramkhangsote ceethnawm buaipui

23 Feb: Ram khangso maanin TV, computer, cellphone, le electronic hnawm te heh phan tak ngaiin lon de lo ai, lailung mi veksen ca lailung hnawm can ruai thil ii tiin UN Environment Program in phuang ii.

Electronic ceet lam hnawmborh naitam ber tu, China in kum siar 2.6 million US ton (2.3 million metric ton) le US in kum siar 3.3 million US tons (3 million metric tons) te ii. Laivum pumpui in kum siar ceet lam hnawmborh heh 40 million US tons (36 million metric tons) um tio ii.
China ram ai computer hnawmborh heh 2007 kum in 2020 songah a lethnih i tuh ii.
India in refrigerator te hmangin hlivua laukul (chlorofluorocarbons and hydrochlorofluorocarbon gases) heh 2020 kum fangin a let thum in tam ruai tuh ii.

Hebron ah Israel le Palestinian te buai

26 Feb: Bible ai hmun poimawh Hebron hmun ah Israel ralkap te le Palestinians te buaihnak um ai, Palestinians te in Israel ralkap te lung thawn sep ii. Hebron hmun heh Judah miphun te le Arab miphun te ai pa ber Abraham ruang phumhmun ii. He hmun ah Israel te le Palestinian te heh biakhnak lamah roh ngaiin buai ii.

Palestinians te in 26 Feb nia heh Muslim te ai Sabbath nia ii tiin phuang ai, he nia ah Hebron ai Biblesong ai kin Pa, Abraham hlan le Bible ai nu Rachel hlan te khiah Muslim te ai ram rothil ii tiin phuang ii.

Palestinians te in Israel ralkap te heh lung in sep dek ai, Abraham hlan hiang in Israel ralkap te hnawt ii.

Israel Prime Minister Benjamin Netanyahu in he thula heh dap ruai tum venapui, he Israel te ai rothil thula ah zai khai danglam ruaihnak um tuhlo ai, Judah te le Muslim te in zalen ngaiin biakhnak lam hmang tlang thil tuhin rel ii.

Hubble Telescope in Pluto lailung danglamhnak zuk ngah

12 Feb: NASA in lailung sumpua lam van lam le arsi te siikhnak ngaw ngai a dahhnak Hubble Telescope hmangin van lam siik tio ai, kin lailung in a hel tiohnak ni hel ve lailung 9 te lak ah hmun hla ber ai Pluto lailung thula danglamhnak hmu ngah ii.

He Pluto lailung awmhmun heh Ni in hla ber hmun ah um maanin a lailung heh dap ngai ai vur tam ngai um ii. He vur te heh Carbonmonoxide hlivua thawn rawi dun ai, mithiam te in he carbonmonoxide umdaan te heh thupui ber ah zingzoi ii.

Hubble in Pluto heh zuk tio ai Pluto hmel heh caan zeimaw zah song neu ah a lailung danglam hnak zuk te kin lailung ah kuat ii. Hubble in zukhnak Pluto planet hmel danglamhnak tu he laai ai zuk bangin um ii.

Ralthuam lam US in Taiwan hnenah

United States in Taiwan hnenah US$6.4billion man ralthuam zuar tuh ai, Black Hawk helicopters, Patriot Advanced Capability-3 missiles, mine siihnak lawng te le information technology lam tel tuh ii.

China le Taiwan heh tunhlan kum 60 thuanthu nai awng ii. 1949 kum ah China mi ram iittu te in Communist nehlo maanin Taiwan ah tlan awng ai cetin China ram pui lang leh tuhin tumtahhnak nai awng ii.

Ahmasa ah US in Taiwan heh China ram pakhat bangin lo dah awng napui 1979 kum fangin US in China le Taiwan karlak ah dinhmun danglam pan ii. US in “Taiwan in amah ram song humhimhnak lam ca a kulhnak ralthuam lam bawm menma ii” tiin thu suah ii.
China in Taiwan heh a ram pakhat ii tiin rel tio ai, tun bangin ralthuam lam US in bawmhnak thula ah khai Chinese Foreign Ministry Spokesman Ma Zhaoxu in US vumah aanglo hnak thu pong suak ve ii. “Taiwan thula heh US le China ram karlak buairuaitu ber ii” tiin phuang ii.

Vur in New York buai ruai teng

26 Feb: America ram ai New York khuapui tu Vur in roh ngai in buai ruai ii. Vur tel hlivua heh roh ngaiin US ram ah zuang maan in vur tam ngai ii. Vur heh inches 20 tian in sah ai, New York khuapui song hmuah motor vak le naperhnak lam te tian in roh ngaiin buai ruai ii. Tlawng te khai vur tam ze maanin pit ruai ai, khuasong ai naupang 1.1 million te tlawngkai thil loin um kul ii. New York mi 200,000 te electric mai nai loin um ii.

China mi te laivum ah sumpai harsa ber

15 Feb: World Wage Research (WWR) pawlkom in laivum ai sumpai lamah mipui in kum 1 ah ngahdaan te zingzoihnak nai ai China ram ai mi te heh Africa ram ai ram 32 te hnakin sumpai ngah tlawm sawn ii ti’n thu phuang ii.

WWR in ram 183 zingzoi ai a tlangpui in ram 1 ai mi in kum 1 ah US $6078 dung hlawh de in hmusuak ai, Chinaram mite in kum 1 ah US $196 dung lek sum nai ten thu phuang ii.
Kum 2008 kum ah China mi 230 million heh kum 1 ah mi 1 in US $44 leek persuak ii tiin Canada ram ai Paking University in phuang ve ii. Hetih i maanin China ram ah mi 600-700 million heh miharsa dinhmun hnakin niam sawn in khuasa tlang tihnak ii.

China offcial website in phuang daan ah acozah in rampum GDP ai 2.6% leek heh Laaizirhnak lamah hmang ai, 4% heh nuncakhnak lamah hmang de ti ii.

United States, Germany, Britain, le France ram te tu nuncakhnak lam ca rampum GDP ai 15% hmang de ii.

Zanniat Fate songai Tinim hnak lang hmasa ber Kin Pa, Rev. Thang Tsin Thuanthu
-Ram Lian Mawi / aizawl

Pa Con Khup le Nu Nai Tlang te nupa heh Khawlei khua Leipui hmun ah Innce in um kawm ai zankhat tu Pa Con Khup mang ah pon var ngai sil ai a tiksa te khai a veksen ai varsiau Mirang 3 te heh a inncer hlanglam in hong zianzo ai a vuansak hleng fang in ding tlang le Mirang 3 song ai 1 in " Con Khup" Aw Con Khup, na nupui in nau pai ngaikhaw a hming ah Thang Tsin bawn tuh ii si ti'n ti ai Cia mi Miring 3 te heh Pa Con Khup te dawng saklam ah hong zianzo in a kon hleng ii tikhai hmuban talo in pai leh lio ii. Cialai teng in Laitlang ah Miring te heh hleng awng lailo ii.

Ciatihbang ai Pa Con Khup in mang a nai hnua ah Nu Nai Tlang in naupai ai fapa niu nai maanin Pa Con Khup khai a aang ngai le nauhming ah "Van mite hming bawn hnak khawmhlen ngasing" ti'n Thang Tsin bawn ii. Pa Thang Tsin heh 1882 kum ah Khawlei khua ah suak ii. Pa Thang Tsin kum 6 ah a pa in hlumte ai, a nu in Lumbang mi Pa Hnun Hlum pasal ah nai leh saal ai Pa Hnu Hlum in khai a rai hlan ah hlum leh maan in Pa Thang Tsin le a nau te 2 Pa Za Lian (Rev. Kip Vum pa) Pa Ci Lian (Rev. Za Duh Pa) le a Nu thawn Lumbang ah um ii.

Pa Thang Tsin kum 10 akhim kum 1902 ah Lumbang miuk Pa Naih Vum in Falam ah tlawngkai tuh in ruai maan in Lumbang naupang dang te kawm tlawngkaai le hla 2 dung a kaai fang in Tlauhmun khua ai Sai Lo thawn hau duun le Pa Thang Tsin in lo neh ii. Hetihbang ai Pa Thang Tsin nehhnak vum ah Sai Lo a lungkhim thillo ai Miuk Pu Van Nawl reel le Pu Van Nawl in Zipeng Bawipa hnen ah reel sal le Pa Thang Tsin tu Tlawng in hnawthnak tuar ii. Hetihbang ai Tlawng ai hnawthnak tuar napui ai Lumbang ah tlunglo in Falam khuasong ah palik Bawi U Tha Hnok te Sai khaal in umde ai zanfang in U Tha Hnok in Laai cuuk de ii. Pa Thang Tsin heh Sai khaal kong ai a zirhnak ah lo zuamngai maanin U Tha Hnok in khai thiamruai daihsah ngai ai Calungpui vum ah Kawl Cafang te ngan sah in cuuk le Pa Thang Tsin khai zanvar mitmulo in zir le zankhat song in Cafang ngan daan le a siar te thiam man siau ii. Zing khuavar fang in U Tha Hnok in a cuukhnak te zawtsal ai a veksen in thiamsiau maanin “Thang Tsin khawzing in na bawm ngai ii, tunhnua ah mi menma ituhlo ii si, Mi hmingthang le Mi hotu ituh tengteng ii si” ti'n hmuifu lo pe ii.

Pa Thang Tsin khai a naper hmun palik Bawipa hnen in Laai cateng a thiam hnua ah Lumbang ah tlungsal ai, a nu le a nau te thawn umtlang ii. Ciateng ah Acozah lam in Pa Naih Vum hnen ah Farhnai eer tuh in ruai ii. Pa Naih Vum in Farhnai eertu tuh mi a si fang in Pa Thang Tsin heh a songsuak fa bang ai a daihhnak maanin Farhnai eertu tuh Tawkhawng naper pe ii. Farhnai te khiah Falam Vuanthok Zung ah kuat le ciatan Rangoon ah phur in thil phunphun bawnhnak ah hmang de ii. Cialai ah Laitlang ah Krihfa aisukhai umlailo ii.

Dr. A. E Carson te nupa heh 1889 kum march hla ah Hakha ah hleng ai Karen Saya te pawl thawn Mission na per tlang ii. Laitlang ah Kawl Laai a zir hnua ABC in Lai Laai bawn ai Laimi te hnen ah cuuk pan ii. Krihfa umlo hmun khua tampui ah Mission Tlawng te hong in naupang te hnen ah Laai zir ruai ii. Hakha, Zokhua, Sakta, Khawpi, Thantlang, Laizo, Lumbang, Khuasak, Tedim, Tonzang le Theizang khua te ah Tlawngphuan sah ai Karen sayate in Laai cuuk pan ii. Kin Zanniat Ramsong ai Tlawng hmasaber ituh in Lumbang khua ah kum 1906 ah Tlawngphuan le Karen tlangval Saya Po Aye in Laai cuuk pan ii.

Cia lai ah miuk Pa Naih Vum in “Thang Tsin he Kawl pa pon le kin linglo tu, nangmah heh a hnen ah umtu lai akul asamhnak te kin reel de ngasi” ti leh Pa Thang Tsin khai Saya Po Aye thawn umtlang in akul asam hnak hmuah lo bawm de ii.

Pa Thang Tsin khai tlangval pui lokhimve hang ai Pa Det Thang fenu, Fenu Nai Men thawn daih duun maann nupui nai tuh in tumtahhnak nai le nupui ngen tuh in a fenu Pa, Pa Det Thang te Inn ah Zubel thawn leeng ii. Ciatihbang in nupui zawt tuh maan in a Zubel heh khaang vum ah a dah fang in “Pa Det thang thinraw le ZU khai kin kul hlah, Mantalh khai kin kulhlah, Mopuai khai kin kul hlah, ningmah daihduun leisi Kawl le Kala te bang in tlunduun tu teu ih” ti leh Pa Thang Tsin khai ciabang te te zaikhai le ti'n a nupui tu mo cang kullo niu in lo hoi awng ii. (Hmai hla ah pehleh sal ngasing)

UN hotu ber in Hlivua hnawm thu phuang

UN Secretary General Ban Ki-moon in lailung hlivua hnawm thula mi hrekkhat in thupui lo in thurelhnak te vumah lungkhim lo ai, Lailung pui hlivua heh a hnawm ngaingai hang ii, he heh thil ciang le tun ai kin dinhmun ii tiin phuang ii.

Hethu heh India Scientist Rajendra Pachauri in 2035 ah Himalaya vur tlang pui tii sek tuh tiin 2007 kum ah UN in thusuah bawn awnghnak heh sang tlaklo ti’n rel awng ai, tun ah Secretary General rori in laivum hlivua hnawm ze hnak thupui ah dah tuhin phuang bet man he India scientist khai a dinhmun in com ruai tuh tian in mithiam pawlin nortlang teng ii. Ban Ki-moon in laivum hlivua hnawm ze zo thula heh lailung ai minung veksen in ling tuhin UN in phuang tuhin meeting ah au suak ii.

Mithiam pawlin 1980 dung ai hlivua dinhmun hnakin 2 degree (3.6 F) ah tun ai hlivua dinhmun heh um tuhin khuaruathnak nai ii. Vurtlang te, vurtolh te ti tete tuh loin le tipuithuanthum hiang ai khua te ti in pil tuh loin zuam kul tuh ii ti’n phuang ii.

ZCF CIRHTI suak tuh hang

Delhi ai um Zanniat Christian Fellowship (ZCF) konghoi hnak in ahmasa ber Zanniat pon in Pathian thu le Christian thuthang te le ZCF thula te nganhnak hlasiar siar pha Laai suak tuh hang ii. Laai hming khai CIRHTI i tuh ii. March 2010 pan in suak tuh ii.

Football Thuthang

Tunkumsong ca Trophy hmasa ber Carling Cup Football zuam duun hnak ah Manchester United Fc te in Astonvilla Fc te heh 2:1 in neh ai champion trophy ngah ii, Hetihbang ai trophy a ngah thil tuh hnak ca ai goal heh minute 73 hnak ah Rooney in a lu hmang ai thun hnak ii, Manchester United Manager, Sir Alex Ferguson in first 11 ah Rooney dahlo in Michale Owen lut hmasa ruai ai minute 5 hnak ah United full back NemanjaVidic fall maan in Astonvilla te in penalty ngah ai goal khat thun hmasa le minute 13 hnakah United forward owen in sutsal ii, Michale Owen heh si khat phur hnak sut napuiai minute 41 hnak ai chance phangai angah hnak heh Astonvilla goal ah thun benlo maan in Manchester United Fc manager in arinsan hnak ber Rooney sawn

heh Sir Alex Ferguson in zaikhai siarhanglo ai final lokai tapang inkhai afootball player junior deuh tepawl azir ruai hnakah hmang menma de ii, tunkum ahtu thupuing in dah ve ii, zaimaantifang in Astonvilla Fc thawn premier league ah asirh fang in nehlomaan in athangnau hnak lawmruai tuhin tunkum Carling Cup final heh thupui ngai ai a dah hnak ii, tuntum ah akhuaruat hnak bang ai nehhnak angah maan in premier league leh champions league lamah khai cakhnak tha zaang tampui kin petuh ai kin fans te khai kin vum ah umsin hnak le rinsan hnak tam pui kin petuh ii ti’n reel ii.

Tun tum carling cup final asirh lai in captain armbrand heh Patric Evara in a ban ah bet ii, tunteng ah Manchester team ah tuahmawh duun hnak maan in captain heh aisu in khai zawmzet in per thil tenlo ii tun tum ah captain Patric Evara in minute 40 hnak ah yellow card hmu ii,first half ah extra time thawn minute 48 sirh ai scond half ah minute 49 sirh maan in a veksen in minute 97 song sirh ii, hemi minute 97 song ah United lam in 2:1 in neh hnak co napui le Villa lamte in khai naukthaih nawr ve napui ai athupui ber goal thun bet benlo heh poi ngai ii, first half extra time minute 47 ah korea star Pak Ji Sung inkhai united ca goal thun thil hnak caanpha ngah napui ai goal song ah lutlo in goal khuam kha in suak lehsal hnak khai United Fc le afans te ca tu pamhaih kulngai ii,scond half apan in minute 3 hnakah khai Berbatove in United winger Valencia ca goalthun thiltuh in bawt sahnapui Villa keeper in lo khamngah hnak khai United ca tu pamhaih kul ngai fawn ii khatlam khatlam thapui suah ai nawr duun maan in hmuh hiam ngai ii, minute 65 ah United right back Rafael tuahmawh duun maan in G Nevili in thleng ii, ciatin minute 73 hnak ah bualrawn hanlam siir in captain Evara in a kehhan lam ke hmang in goal hmai ah sirh ai United forward Rooney in alu in toh ai Villa keeper kekeh lam goal song cunglam siirah lut maanin United lam in 2:1 in neh hnak ngah ai tunkum 2010 Carling Cup Trophy heh Manchester United Fc te in ngah ii.
Prenier League Table
Pl W D L Pts
1 Chelsea 28 19 4 5 61
2 Man. United 28 19 4 6 60
3 Arsenal 28 18 4 6 58
4 Tottenham 28 14 7 7 49
5 Man City 27 13 10 4 49
6 Liverpool 28 14 6 8 48

Sports
23Feb 2010 zanlai ah English Premier league ah Manchester United leh Wesham United te sirh le Inn teek Manchester United lam in 3:0 in neh ii, hemi zan ah Manchester forword Rooney in Goal 2 thun ai Second Half hnua ai Berbatove thleng ai lut tu Michale Owen in Goal khat thun ve ii. Rooney Goal thun hnak te heh Manchester winger Valancia bawt sahhnak veve heh Rooney in a Lu hmang ai thun veve hnak vum ah Manchester coach Sir Alex in “i sanlai ai i lu hmang in goal i thunhnak video te siik i tuh ii” ti'n hnihsa rel ai, Rooney heh Christiano Ronaldo tello ai “Manchester kin cakpuitu ber ii” ti'n aan ii, Manchester United leh Chelsea heh vai 28 veve sirhzo ai Chelsea in point 61 in pakhat hnak dinhmun ngah ai United in point 60 hmu in pahnih hnak dinhmun ah um ii.Point 58 nai Arsenal heh pathum hnak ii. Rooney heh tunkum song in Goal 27 thunzo ai English Premier League ah Top Score dinhmun ah um ii.Dt27/2/2010 zan English premier League ah Manchestern City in Chelsea te Home ah 4:2 in cak ii.

ZYO Palai te Lawngtlai Chin National Day ah

Febuary ni 20 nia ah Avai 62hnak Chin National Day heh Chin miphun umhmun ram cangcang ah Laimi veksen in songlawi ngaiin hmangtlang ii.

Mizoram ai Lawngtlai District (LADC) ai Lawngtlai khuapui ah Chin National Day hmang ai, hetah Aizawl ai um Zanniat Youth Organization Palai te le Sim Cultural troop te in Zanniat laam le Sim laam te laam ii.

Lawngtlai ai Zanniat le Sim lam Cultural troop heh Pu Ro Za Thang le Pa Ram Lian Mawi (Secretary, ZYO-ZMP Mizoram) te in hoha ai, Aizawl in Zanniat mi 23 tel ve ii

ZCF Delhi Thuthang

Kum 10 vum Delhi ah Zanniat te hleng tlang zo napui, 3 Jan 2010 , Nipuinia (Sunday) pan in Zanniat Circle mi veksen hmun khat ah khawmhnak le khawmhmun nai hang ii. Delhi ah Zanniat te umhmun heh hla dun deuh maanin Zankhawm khai hmun 2 ah khawmhnak nai ai, Nipuinia (Sunday) nia ah veksek komdunin khawmhnak nai ii.

ZCF Delhi ding hnua fangin Sitapuri ah Crusade Vai-2 nai zo ai, 1-5 Mar 2010 nia ah Vikaspuri Area lam te ca Crusade pui ZCF in nai tuh ii. Speaker te khai ZCF Delhi pastor te i tuh ii. 24-25 Feb nia ah ZCF Department ai hoitu veksen telhnak Hoidunhnak Zirhnak (Leadership Training) khai ZCF Hall ah nai tlang ii. 26 Feb nia ah ZCF Nu Pawlkom (Women Department) te in amah te pawl Leadership Training nai saal ii.

Delhi ah ZCF ding maanin Delhi ai um Zanniat fa te Pathian thu ah le nunphung ah khangso rianro pan ii.

Delhi ah pawl thar BGN ding

Delhi ai um kawlram iittu khangthar te le India ram ai Swaraj Peet Trust tihnak Ghandian Movement te thawn Burmese Ghandian Network for Nonviolence (BGN) tihnak 7 Feb 2010 nia ah din ii. He pawl in a tumhnak ber tu thazang thawn tawngduun hnak le thisan suakhnak tel lo in laivum ah remhnak bawn tuh hnak lam ii. Mahatma Ghandi in thazang canvaihnak le thisan suahdunhnak um loin thula lam in India ram heh Independence ngah ruai ii. Cia bang pah in laivum ram hmun cangcang ah Ghandhi in remhnak a ngah awnghnak bangin zalenhnak sual suak tuh heh Ghandian Movement in a tumhnak ii. Burma ram khai Ghandian Movement hmangin khangthar te in zalenhnak sual tum ii.

Tapung te leh Kawlram mite lak ah Daan khongai in hmang tuh

3 Feb 2010 nia ah Mizoram Home Minister R Lalzirliana in amah office ah Mizo Historial and Cultural Map, Dr R.L. Thanmawia bawn nak release-hnak programmes ah “Hetih bang in Mizoram song ai ralmuanghnak hnawmruaitute underground (Tapung) leh sualhnak pungruaitu Kawlram lam unau te lak ah Daan kho ngai in hmang tuh ii” ti'n thu phuang ii, “Kawlram lam ai unau te vum ai Daan kin hmang tuh hnak maan in mawhhlukhnak khai tampui tawk tuh napui ai, poi tituhlo ing, Daan bangin khongai in fehpui tum ing” ti'n thu suah ii.

Home Minister in, “Kawlram ai unau te lak ah mipha tampui um napui ai, Mizoram ai sualhnak phuncaang, Mirek, Ruko, Damiah, Rap case le Riithei thil phur le Zuar thubuai tamber heh kin Unaute lak in hleng tamber maan in Mizoram ai ralmuanghnak khai rohngai kin hnawm ruai ii, ciamaan in Foreigner Act heh khongai in hmangtuh ai hemi Daan hlunlo te tu pom in Kawlram ram lamah kuat kinkul tuh ii” ti'n reel ii.

“Hetihbang ai Kawlram Unau te vum ai Daan a hmanghnak maan in politics lam ah a phalo lam ai reelsiathnak tian tawk khal selai kin hmang kul tengteng hnak Daan thu ii” ti'n Home Minister in reel ii.

Mizoram in Burma mi 33 ramri ah kuat saal

4 Feb 2010 (Fri) nia ah Burma mi 33 te heh Aizawl DC Court ai thu reelcat hnak bang in Indo-Myanmar ramri ah kuat tuh in Bawngkawn Police Station ah Prison Van in phur ii.
Tun tum ai mi 33 te heh Central Jail ah ni 3 song a dah hnau ah, Aizawl DC Court in Burma ram lam ah kuatsaal tuh in thu reelcathnak bang pah in 5 Feb 2010 zanlam ah Prison Van in Ramri lam ah phur ii. Hemi thuthawn pehpar in Champhai SP Pu Lalthanmawia in Vanglaini hnen ai a reel daan ah tu Champhai a hleng hnua ah VCourt thu bangpah in Burma Police te kut ah pet uh ii ing ti'n reel napui ai, 6 Feb 2010 zanlam ah mi 33 te heh Zokhawthar to Aizawl Service, Sumo te pawl in Aizawl lam ah phur lehsal zo ii ti'n Ramri ai kin thuthang langhmun in thu kin than sal ii.

ZYO Secretary in nau thar nai

Mizoram ai Zanniat Youth Organization ZYO - ZMP Secretary Pa, Ram Lian Mawi le Nu, Van Lal Ruati te in 12 Feb 2010 Friday sun nazi 01:00 pm ah Fapa pahnihhnak tuh Aizawl Civil Hospital ah nai le Joseph Thian Lian thang ti'n Pa Ro Za Thang in Nau hming bawn sah ii. Nu le Pa ca rinsantlak Fapa itu hram seh,Chief Editor.

Published by:
Zanniat Youth Organization-Zanniat Mino Pawlkom (ZYO-ZMP)